VORIA

I me ossi no vogio
che i daga pensiero
de dove butarli.
Mi vogio na busa
in tera scavà
magari sol suto
na cassa de legno
solo piolà,
ma senza sfesse:
el ciaro me svegia
e i spiferi fredi
me fa straunar.
In Ciesa voria
na bela cantà,
voria el Dies irae
e el Libera me;
el discorso del prete
co poche busìe.
La zente in corteo
ciacolando bel beo
come a passegio:
speremo sia beo.
Sol zegio de l'erba
se ghe fusse dei fiori
catèghene on pochi

 

da portarghe ai putini
e a chi se vol ben.
Butandome zò
drento la busa
ve prego fe pian:
se desfa la crose
sol peto co'e man.
Se qualcun ga piazère
da farse na lagrema
che 'l pianza, poareto:
no 'l fa male a nissun.
De sora: na croze
fata de piera
co scrito el me nome:
cossì par ricordo.
Eco mi vago.
El me corpo de tera
co la tera de sora
che 'l sole la scalda,
e che nassa dei fiori
de tuti i colori.
Qualche volta, se posso,
passando de qua
sarò ben contento
de darghe on ocià.

29/6/2010

Autore    Zanninello dr. Giovanni     di Cavarzere


TORNA A    Pagina Poesie e racconti